ಏನಿದು ಗೃಹಲಕ್ಷ್ಮಿ ಬಹು ಉದ್ದೇಶ ಸಹಕಾರ ಸಂಘ?
ಗೃಹಲಕ್ಷ್ಮಿ ಬಹು ಉದ್ದೇಶ ಸಹಕಾರ ಸಂಘವು ಕರ್ನಾಟಕ ಸರ್ಕಾರದ ಗೃಹಲಕ್ಷ್ಮಿ ಯೋಜನೆಯ ಫಲಾನುಭವಿಗಳಾದ ಮನೆ ಯಜಮಾನಿಯರಿಗೆ ಆರ್ಥಿಕ ನೆರವು ವಿಸ್ತರಿಸಲು ಸ್ಥಾಪಿಸಲಾದ ಹೊಸ ಸಹಕಾರ ಸಂಘವಾಗಿದೆ. ಇದು ಮಾಸಿಕ ಅನುದಾನದ ಹೊರತಾಗಿ, ಸದಸ್ಯತ್ವ ಪಡೆದ ಮಹಿಳೆಯರಿಗೆ ಕಡಿಮೆ ಬಡ್ಡಿ ದರದಲ್ಲಿ 3 ಲಕ್ಷ ರೂ.ವರೆಗೆ ಸಾಲ ಸೌಲಭ್ಯ ಒದಗಿಸುತ್ತದೆ. ಈ ಸಾಲಗಳನ್ನು ಸಣ್ಣ ಉದ್ಯಮಗಳನ್ನು ಪ್ರಾರಂಭಿಸಲು, ಸ್ವಯಂ ಉದ್ಯೋಗ ಕೈಗೊಳ್ಳಲು ಅಥವಾ ತುರ್ತು ಹಣಕಾಸು ಅಗತ್ಯಗಳನ್ನು ಪೂರೈಸಲು ಬಳಸಬಹುದು. ಇದರಿಂದ ರಾಜ್ಯದ ಮಹಿಳೆಯರ ಆರ್ಥಿಕ ಭದ್ರತೆ ಮತ್ತು ಸ್ವಾವಲಂಬನೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ. ಈ ಉಪಕ್ರಮ ಕೇವಲ ಸಾಲ ವಿತರಣಾ ಯೋಜನೆಯಾಗಿರದೆ, ರಾಜ್ಯದ ಸುಮಾರು 1.24 ಕೋಟಿ ಮಹಿಳೆಯರನ್ನು ಸ್ವಾವಲಂಬಿಗಳನ್ನಾಗಿ ಮಾಡುವ ಮತ್ತು ಅವರನ್ನು ತಮ್ಮದೇ ಬ್ಯಾಂಕ್ನ ಮಾಲೀಕರನ್ನಾಗಿ ಪರಿವರ್ತಿಸುವ ಗುರಿಯನ್ನು ಹೊಂದಿದೆ.
ಸಹಕಾರ ಸಂಘದ ಪ್ರಮುಖ ಉದ್ದೇಶಗಳುಗೃಹಲಕ್ಷ್ಮಿ ಬಹು ಉದ್ದೇಶ ಸಹಕಾರ ಸಂಘವು ಮಹಿಳಾ ಸಬಲೀಕರಣದ ಹಲವಾರು ಅಂಶಗಳನ್ನು ಒಳಗೊಂಡಿದೆ.
- ಮುಖ್ಯ ಗುರಿ: ಸಹಕಾರ ಸಂಘದ ಪ್ರಮುಖ ಉದ್ದೇಶವು ಸದಸ್ಯರಿಗೆ ಅತ್ಯಂತ ಕಡಿಮೆ ಬಡ್ಡಿ ದರದಲ್ಲಿ 3 ಲಕ್ಷ ರೂ.ದವರೆಗೆ ವೈಯಕ್ತಿಕ ಸಾಲ ಒದಗಿಸುವುದಾಗಿದೆ. ರಾಷ್ಟ್ರೀಕೃತ ಬ್ಯಾಂಕ್ಗಳಿಗೆ ಸಮನಾಗಿ, ವಾರ್ಷಿಕ 7-9% ಅಥವಾ ಅದಕ್ಕಿಂತ ಕಡಿಮೆ ಬಡ್ಡಿ ದರದಲ್ಲಿ ಸಾಲ ದೊರೆಯಲಿದೆ.
- ಸಾಲದ ಉದ್ದೇಶಗಳು: ಈ ಹಣವನ್ನು ಮಹಿಳೆಯರು ಸಣ್ಣ ವ್ಯಾಪಾರ, ಕುಟೀರ ಕೈಗಾರಿಕೆ, ಸ್ವಯಂ ಉದ್ಯೋಗ ಉದ್ಯಮಗಳನ್ನು ಪ್ರಾರಂಭಿಸಲು, ಕೃಷಿ, ಪಶುಸಂಗೋಪನೆ, ಮಕ್ಕಳ ಶಿಕ್ಷಣ, ವಾಹನ ಖರೀದಿ ಅಥವಾ ವೈದ್ಯಕೀಯ ಖರ್ಚು ಸೇರಿದಂತೆ ಯಾವುದೇ ಅಗತ್ಯಗಳಿಗಾಗಿ ಬಳಸಬಹುದು.
- ಆರ್ಥಿಕ ಸ್ವಾತಂತ್ರ್ಯ: ಖಾಸಗಿ ಫೈನಾನ್ಸ್ಗಳ ಹೆಚ್ಚಿನ ಬಡ್ಡಿ ಮತ್ತು ಚಕ್ರಬಡ್ಡಿಯ ಕಿರುಕುಳದಿಂದ ಮಹಿಳೆಯರಿಗೆ ಮುಕ್ತಿ ನೀಡಿ, ಅವರ ಆರ್ಥಿಕ ಸ್ವಾತಂತ್ರ್ಯ ಮತ್ತು ಜೀವನ ಮಟ್ಟವನ್ನು ಸುಧಾರಿಸುವುದು ಇದರ ಅಂತಿಮ ಗುರಿಯಾಗಿದೆ.
ಅರ್ಹತಾ ಮಾನದಂಡಗಳೇನು?
- ಸಹಕಾರ ಸಂಘಕ್ಕೆ ಸೇರಲು ಗೃಹಲಕ್ಷ್ಮಿ ಯೋಜನೆಯ ಫಲಾನುಭವಿಗಳು ಮಾತ್ರ ಅರ್ಹರಾಗಿದ್ದಾರೆ, ಅಂದರೆ ರಾಜ್ಯದ ಸುಮಾರು 1.24 ಕೋಟಿ ಅರ್ಹ ಮಹಿಳೆಯರು ಸದಸ್ಯರಾಗಬಹುದು.
- ಸದಸ್ಯತ್ವ ಪಡೆಯಲು ಮಹಿಳೆಯರು ಒಂದು ಬಾರಿ 1,000 ರೂ. ಷೇರು ಹಣ ನೀಡಬೇಕು (ಸ್ವಯಂಪ್ರೇರಿತ), ಇದು 1,250 ರೂ.ರ ಒಟ್ಟು ಶುಲ್ಕದಲ್ಲಿ ಸೇರಿದೆ.
- ಪ್ರತಿ ಸದಸ್ಯರು ಪ್ರತಿ ತಿಂಗಳು ಕನಿಷ್ಠ 200 ರೂ.ಅನ್ನು ಉಳಿತಾಯ ರೂಪದಲ್ಲಿ ಜಮಾ ಮಾಡಬೇಕು, ಆದರೆ ತಮ್ಮ ಆದಾಯಕ್ಕೆ ತಕ್ಕಂತೆ ಹೆಚ್ಚು ಹಣವನ್ನು ಸಹ ಠೇವಣಿ ಇಡಲು ಅವಕಾಶವಿದೆ.
- ಸದಸ್ಯರು ಸತತ 6 ತಿಂಗಳುಗಳ ಕಾಲ ನಿರಂತರ ಉಳಿತಾಯ ಮಾಡಿದ ನಂತರ ಸಾಲ ಪಡೆಯಲು ಅರ್ಹರಾಗುತ್ತಾರೆ.
- ಸಾಲದ ಮೊತ್ತವು 30,000 ರೂ. ದಿಂದ ಗರಿಷ್ಠ 3,00,000 ರೂ. ವರೆಗೆ ಲಭ್ಯವಿದ್ದು, ಇದು ಸದಸ್ಯತ್ವದ ಅವಧಿ ಮತ್ತು ಅವರ ಉಳಿತಾಯದ ಆಧಾರದ ಮೇಲೆ ನಿರ್ಧಾರವಾಗುತ್ತದೆ.
- ಈ ಸಾಲವನ್ನು ಪಡೆಯಲು ಫಲಾನುಭವಿಗಳಿಗೆ ಯಾವುದೇ ಜಾಮೀನು ಅಥವಾ ಷೂರಿಟಿ ಅಗತ್ಯವಿರುವುದಿಲ್ಲ, ಅಂದರೆ ಯಾವುದೇ ಬಾಹ್ಯ ಬ್ಯಾಂಕ್ ಗ್ಯಾರಂಟಿ ಇಲ್ಲದೆ ಸಾಲ ಲಭ್ಯ.
ಗೃಹಲಕ್ಷ್ಮಿ ಬಹು ಉದ್ದೇಶ ಸಹಕಾರ ಸಂಘ ಹೇಗೆ ಕಾರ್ಯನಿರ್ವಹಿಸುತ್ತದೆ?
- ಮಾಲೀಕತ್ವ: ಇದು ಸಂಪೂರ್ಣವಾಗಿ ಮಹಿಳೆಯರೇ ನಡೆಸುವ ಬ್ಯಾಂಕ್ ವ್ಯವಸ್ಥೆಯಾಗಿದ್ದು, ಗೃಹಲಕ್ಷ್ಮಿ ಫಲಾನುಭವಿಗಳೇ ಸದಸ್ಯರಾಗಿ, ತಾವೇ ಠೇವಣಿ ಇಟ್ಟು, ತಾವೇ ಸಾಲ ಪಡೆಯುವ ವ್ಯವಸ್ಥೆಯಾಗಿದೆ. ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ಅವರ ಪ್ರಕಾರ, “ಇದು ವಿಶ್ವದಲ್ಲೇ ಮೊದಲ ಬಾರಿಗೆ ಮಹಿಳೆಯರೇ ಮಾಲೀಕರಾಗಿರುವ ಬ್ಯಾಂಕ್.”
- ನೋಂದಣಿ ಪ್ರಕ್ರಿಯೆ: ಸದ್ಯಕ್ಕೆ, ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಜಿಲ್ಲಾ ಮಟ್ಟದ ಅಧಿಕಾರಿಗಳು ಸದಸ್ಯತ್ವ ನೋಂದಣಿಗೆ ನೆರವಾಗುತ್ತಿದ್ದಾರೆ.
- ವ್ಯವಹಾರ ರೀತಿ: ಸಂಪೂರ್ಣ ನಗದು ರಹಿತ ವಹಿವಾಟಿಗೆ ಒತ್ತು ನೀಡಲಾಗಿದ್ದು, ಫೋನ್ಪೇ, ಜಿಪೇ ಅಥವಾ ಯುಪಿಐ ಮೂಲಕ ಸಣ್ಣ ಮೊತ್ತದ ಠೇವಣಿ ಸಂಗ್ರಹಿಸಲಾಗುತ್ತಿದೆ. ಸಾಲದ ಹಣ ನೇರವಾಗಿ ಫಲಾನುಭವಿಗಳ ಖಾತೆಗೆ ವರ್ಗಾವಣೆಯಾಗುತ್ತದೆ.
- ಮಾಸಿಕ ಕಂತುಗಳು: ಸಾಲದ ಮೊತ್ತ (30,000 ರೂ.ದಿಂದ 3 ಲಕ್ಷ ರೂ.ವರೆಗೆ) ಮತ್ತು ಮರುಪಾವತಿ ಅವಧಿಯನ್ನು ಅವಲಂಬಿಸಿ ಮಾಸಿಕ ಕಂತುಗಳನ್ನು ನಿಗದಿಪಡಿಸಲಾಗುತ್ತದೆ.
- ಅವಧಿ: ಸಾಲ ಮರುಪಾವತಿ ಅವಧಿಯನ್ನು ಸಾಮಾನ್ಯವಾಗಿ 1 ರಿಂದ 5 ವರ್ಷಗಳವರೆಗೆ ನಿಗದಿಪಡಿಸುವ ಸಾಧ್ಯತೆಗಳಿವೆ.
ಸಂಘದ ಸಾಲ ಪಡೆಯುವುದು ಹೇಗೆ?
- ಗೃಹಲಕ್ಷ್ಮಿ ಫಲಾನುಭವಿ: ನೀವು ಕಡ್ಡಾಯವಾಗಿ ಗೃಹಲಕ್ಷ್ಮಿ ಯೋಜನೆಯಲ್ಲಿ ನೋಂದಾಯಿತರಾಗಿರಬೇಕು.
- ಸದಸ್ಯತ್ವ ಪಡೆಯಿರಿ: ಸಹಕಾರಿ ಸಂಘಕ್ಕೆ 1,000 ರೂ. ಷೇರು ಹಣ ನೀಡಿ ಸದಸ್ಯತ್ವವನ್ನು ಪಡೆದುಕೊಳ್ಳಬೇಕು.
- ಮಾಸಿಕ ಉಳಿತಾಯ: ಪ್ರತಿ ತಿಂಗಳು ಕಡ್ಡಾಯವಾಗಿ ಕನಿಷ್ಠ 200 ರೂ.ಉಳಿತಾಯ ಖಾತೆಗೆ ಜಮಾ ಮಾಡಬೇಕು.
- ಅರ್ಹತೆಗಾಗಿ ಕಾಯುವಿಕೆ: ಸತತ 6 ತಿಂಗಳುಗಳ ಕಾಲ ನಿಯಮಿತವಾಗಿ ಉಳಿತಾಯ ಮಾಡಿ.
- ಕೇಂದ್ರಕ್ಕೆ ಭೇಟಿ: 6 ತಿಂಗಳ ನಂತರ ನಿಮ್ಮ ಹತ್ತಿರದ ಅಂಗನವಾಡಿ ಕೇಂದ್ರ ಅಥವಾ ತಾಲೂಕು ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಕಚೇರಿಗಳಿಗೆ ಭೇಟಿ ನೀಡಿ.
- ನೋಂದಣಿ ಮತ್ತು ದಾಖಲೆ ಸಲ್ಲಿಕೆ: ಅಲ್ಲಿ ಲಭ್ಯವಿರುವ ಸದಸ್ಯತ್ವ ಫಾರಂ ಅನ್ನು ಭರ್ತಿ ಮಾಡಿ ಮತ್ತು ನಿಮ್ಮ ಅಗತ್ಯ ಗುರುತಿನ ದಾಖಲೆಗಳನ್ನು ಸಲ್ಲಿಸಿ.
- ಸಾಲ ವಿತರಣೆ: ಅರ್ಜಿ ಸಲ್ಲಿಸಿದ ನಂತರ, ಸಾಲವು ತಕ್ಷಣ ಮಂಜೂರಾಗಿ ನಿಮ್ಮ ಬ್ಯಾಂಕ್ ಖಾತೆಗೆ ಜಮಾ ಆಗುತ್ತದೆ.
ಮಹಿಳೆಯರಿಗೆ ಯೋಜನೆ ಪ್ರಯೋಜನಗಳೇನು?ಈ ಸಹಕಾರಿ ಬ್ಯಾಂಕ್ ಮಹಿಳೆಯರಿಗೆ ಕೇವಲ ಹಣಕಾಸಿನ ನೆರವು ನೀಡುವುದಿಲ್ಲ, ಬದಲಿಗೆ ಅವರ ಸಮಗ್ರ ಸಬಲೀಕರಣಕ್ಕೆ ಕಾರಣವಾಗುತ್ತದೆ.
- ಮಹಿಳೆಯರು ಕೇವಲ ಸಹಾಯ ಪಡೆಯುವವರಿಂದ, ತಮ್ಮದೇ ಬ್ಯಾಂಕ್ನಲ್ಲಿ ಹೂಡಿಕೆದಾರರನ್ನಾಗಿ ಮತ್ತು ಮಾಲೀಕರನ್ನಾಗಿ ಮಾರ್ಪಡುತ್ತಾರೆ.
- ಇದು ಸರ್ಕಾರಿ ಬೆಂಬಲಿತ ಸಹಕಾರ ಸಂಘವಾಗಿರುವುದರಿಂದ ಇದನ್ನು ಮುಚ್ಚುವ ಬೀತಿ ಇಲ್ಲ. ಒಂದು ವೇಳೆ ಸರ್ಕಾರ ಬದಲಾದರೂ ಸಹಕಾರ ಸಂಘ ಎಂದಿನಂತೆಯೇ ಮುಂದುವರಿಯಲಿದೆ.
- ಸ್ತ್ರೀ ಶಕ್ತಿ ಸ್ವ-ಸಹಾಯ ಸಂಘಗಳ ಯಶಸ್ಸಿನ ಅನುಭವದ ಮೇಲೆ ರೂಪಿಸಲಾಗಿರುವ ಈ ಯೋಜನೆ, ಅಕ್ರಮ ಖಾಸಗಿ ಸಾಲಗಾರರ ಹೆಚ್ಚಿನ ಬಡ್ಡಿ ಮತ್ತು ಕಿರುಕುಳದಿಂದ ಸಂಪೂರ್ಣ ಮುಕ್ತಿ ನೀಡುತ್ತದೆ.
- ಸಾಲ ಮರುಪಾವತಿಯನ್ನು ಮಹಿಳೆಯರ ಆದಾಯಕ್ಕೆ ತಕ್ಕಂತೆ ಸುಲಭ ಕಂತುಗಳಲ್ಲಿ ನಿಗದಿಪಡಿಸಲಾಗುತ್ತದೆ.
