ಶಬರಿಮಲೆ: ಶಬರಿಮಲೆ ತೀರ್ಥಾಟನೆಯ ಋತುವಿನ ಹಿನ್ನೆಲೆಯಲ್ಲಿ ಪ್ರಯಾಣಿಕರ ಸಮಸ್ಯೆ ಪರಿಹರಿಸಲು ಪೂರಕವಾಗಿ ಕೇರಳಕ್ಕೆ 10 ವಿಶೇಷ ರೈಲುಗಳನ್ನು ಮಂಜೂರು ಮಾಡಲಾಗಿದೆ ಎಂದು ರೈಲ್ವೇ ಸಚಿವ ಅಶ್ವಿ‌ನಿ ವೈಷ್ಣವ್‌ ತಿಳಿಸಿದ್ದಾರೆ.
ಒಟ್ಟು 416 ವಿಶೇಷ ಟ್ರಿಪ್‌ಗಳನ್ನು ಮಂಜೂರು ಮಾಡಲಾಗಿದೆ ಎಂದು ರೈಲ್ವೇ ಸಚಿವರು ತಿಳಿಸಿದ್ದಾರೆ. ಕೊಲ್ಲಂ-ಎರ್ನಾಕುಳಂ ಮೆಮುಗೆ ಚೆರಿಯಪಟ್ಟಣದಲ್ಲಿ ಹೊಸ ನಿಲ್ದಾಣವನ್ನು ನಿಗದಿಪಡಿಸಲಾಗಿದೆ. ಈ ಹಿಂದೆ ಮೆಮು ಸೇವೆಯನ್ನು 6 ತಿಂಗಳವರೆಗೆ ವಿಸ್ತರಿಸಿದಾಗ ಹೆಚ್ಚಿನ ನಿಲುಗಡೆಗೆ ಅವಕಾಶ ನೀಡಬೇಕೆಂಬ ಬೇಡಿಕೆ ಇತ್ತು. ಪಾಲರುವಿ ಎಕ್ಸ್‌ಪ್ರೆಸ್‌ ಮತ್ತು ವೇನಾಡ್‌ ಎಕ್ಸ್‌ಪ್ರೆಸ್‌ನಂತಹ ರೈಲುಗಳಲ್ಲಿನ ದಟ್ಟಣೆಯನ್ನು ಪರಿಗಣಿಸಿ ಮೆಮು ಅವಧಿಯನ್ನು ವಿಸ್ತರಿಸಲಾಗಿದೆ.
416 ವಿಶೇಷ ರೈಲು ಸೇವೆಯಲ್ಲಿ ನೈಋತ್ಯ ರೈಲ್ವೇಯ 42 ಟ್ರಿಪ್‌ಗಳು, ದಕ್ಷಿಣ ರೈಲ್ವೇಯ 138 ಟ್ರಿಪ್‌ಗಳು , ದಕ್ಷಿಣ ಮಧ್ಯ ರೈಲ್ವೇಯ 192 ಟ್ರಿಪ್‌ಗಳು ಮತ್ತು ಈಸ್ಟ್‌ ಕೋಸ್ಟ್‌ ರೈಲ್ವೇಯ 44 ಟ್ರಿಪ್‌ಗಳು ಒಳಗೊಂಡಿವೆ.
