ಕಾರ್ಕಳ: ಕಂಬಳ ಕ್ಷೇತ್ರದಲ್ಲಿ ತನ್ನ ಮಿಂಚಿನ ಓಟದ ಮೂಲಕ ಅಪಾರ ಅಭಿಮಾನಿಗಳನ್ನು ಸಂಪಾದಿಸಿದ್ದ ಖ್ಯಾತ ‘ನಂದಳಿಕೆ ಪಾಂಡು’ ಕೋಣ ಸೋಮವಾರ (ಸೆ.28) ಮುಂಜಾನೆ ವಯೋಸಹಜ ಅನಾರೋಗ್ಯದಿಂದ ನಿಧನ ಹೊಂದಿದೆ.
ನಂದಳಿಕೆ ಶ್ರೀಕಾಂತ್ ಭಟ್ ಅವರ ಹಟ್ಟಿಯಲ್ಲಿದ್ದ ಪಾಂಡು ಸುಮಾರು 23 ವರ್ಷ ವಯಸ್ಸಾಗಿತ್ತು. ಕಂಬಳ ಅಖಾಡದಲ್ಲಿ ಹಲವು ವರ್ಷಗಳ ಕಾಲ ಅದ್ಭುತ ಪ್ರದರ್ಶನ ನೀಡಿದ್ದ ಪಾಂಡು 150ಕ್ಕೂ ಅಧಿಕ ಪದಕಗಳನ್ನು ಗೆದ್ದಿದ್ದಾಗಿ ವರದಿಯಾಗಿದೆ. ಕೆಲವು ವರದಿಗಳಲ್ಲಿ 200ಕ್ಕೂ ಅಧಿಕ ಪದಕಗಳ ಸಾಧನೆಯನ್ನೂ ಉಲ್ಲೇಖಿಸಲಾಗಿದೆ.
ಕಾಲಿನ ನ್ಯೂನತೆ ಇದ್ದರೂ ತನ್ನ ವೇಗದ ಓಟದಿಂದ ಕಂಬಳ ಪ್ರೇಮಿಗಳ ಮನಗೆದ್ದಿದ್ದ ಪಾಂಡು, ಸುಮಾರು ಮೂರು ವರ್ಷಗಳ ಹಿಂದೆ ಹೊಕ್ಕಾಡಿಗೋಳಿ ಕಂಬಳದಲ್ಲಿ ಕೊನೆಯ ಬಾರಿಗೆ ಪದಕ ಗೆದ್ದ ಬಳಿಕ ನಿವೃತ್ತ ಜೀವನ ನಡೆಸುತ್ತಿತ್ತು. ಪಾಂಡುವಿನ ನಿಧನಕ್ಕೆ ಕಂಬಳಾಭಿಮಾನಿಗಳು, ಯಜಮಾನರು ಹಾಗೂ ಓಟಗಾರರು ಸಂತಾಪ ವ್ಯಕ್ತಪಡಿಸಿದ್ದಾರೆ.
