ಬೆಳ್ತಂಗಡಿ: ಶಿರ್ಲಾಲ್ ಗ್ರಾಮದ ಮಣಿಲ ಎಂಬಲ್ಲಿ ಅರಣ್ಯ ಇಲಾಖೆ ಇರಿಸಿದ್ದ ಬೋನಿಗೆ ಅಪರೂಪದ ಕರಿ ಚಿರತೆಯೊಂದು ಬಿದ್ದಿದೆ.
ಮಣಿಲದ ಪದ್ಮನಾಭ ಅವರ ಮನೆಯ ಸಮೀಪ ವೇಣೂರು ವಲಯ ಅರಣ್ಯ ಇಲಾಖೆಯವರು ಕೆಲ ದಿನಗಳ ಹಿಂದೆ ಬೋನನ್ನು ಇರಿಸಿದ್ದರು. ಶನಿವಾರ (ಅ.10) ಬೆಳಗ್ಗೆ ಬೋನಿಗೆ ಕರಿ ಚಿರತೆ ಬಿದ್ದಿದ್ದು, ಅಪರೂಪದ ಕರಿಚಿರತೆ ನೋಡಲು ಗ್ರಾಮಸ್ಥರು ಸೇರಿದ್ದರು.
ಸೆರೆಯಾದ ಚಿರತೆ ಆರೋಗ್ಯವಾಗಿದ್ದು, ಅರಣ್ಯ ಇಲಾಖೆಯ ಪಶುವೈದ್ಯರಿಂದ ಆರೋಗ್ಯ ತಪಾಸಣೆ ನಡೆಸಿದ ಬಳಿಕ ಸುರಕ್ಷಿತವಾಗಿ ಸಂರಕ್ಷಿತ ಅರಣ್ಯ ಪ್ರದೇಶಕ್ಕೆ ಬಿಡಲಾಗುವುದು ಎಂದು ವೇಣೂರು ವಲಯ ಅರಣ್ಯಾಧಿಕಾರಿ ಭರತ್ ಯು.ಜಿ. ತಿಳಿಸಿದ್ದಾರೆ.
ಕಾರ್ಯಾಚರಣೆಯಲ್ಲಿ ಅಳದಂಗಡಿ ಶಾಖೆಯ ಉಪವಲಯ ಅರಣ್ಯಾಧಿಕಾರಿ ಹರಿಪ್ರಸಾದ್, ಗಸ್ತು ವನಪಾಲಕ ಮಂಜುನಾಥ್ ಬಿ.ಎಸ್., ಅರಣ್ಯ ವೀಕ್ಷಕ ವೆಂಕಪ್ಪ ನಾಯ್ಕ, ಪೂವಪ್ಪ ನಾಯ್ಕ ಹಾಗೂ ಸ್ಥಳೀಯರು ಭಾಗವಹಿಸಿದ್ದರು.
